رسالة إلى صاحب المقطع الشهير :
" جدع ياباشا "
أخدت براءة اليوم والنيابة قالت انك برىء والفيديو ملفق ووو..
جدع ياباشا
خلعت منها زى الشعرة من العجين ولا فارقه معاك ؟!
جدع ياباشا
لبست نضارتك الشمسية خوفا على عينيك الثمينتان..
فقعت عين كام واحد بلوشى ياباشا ؟؟
أقولك إيه شغال فى الداخلية ياباشا .. صرفوا عليك دم قلوبهم وعلموك إزاى تكون ليهم تابع ياباشا.
أيوا تابع وهتعيش تابع طول عمرك ياباشا ..
اوعى تكون فاكر انك هتفلت من الثوار ياباشا .. تق تق إنسى ياباشا إنسى .. ستظل مطاردا فى عقر دارك , فى احلامك , فى نزهاتك الخلوية مع العائلة , فى النادى , فى محل عملك , فى طريق عودتك لبيتك , فى جلستك وأنت تلعب مع البلاى استشن مع زمايلك الروشين زيك , سيطاردك شبح جُرمك فى حق من أستأمنوك على أرواحهم وحياتهم ,, مش بقولك إنسى ياباشا !!.
تفتكر ياباشا من رأووا بعين واحدة نضارتك الشمسية الجميلة وأنت من أطفأت النور فى عينهم الأخرى سيتركونك بدون قصاص ؟؟
أبدا والله ياباشا .. والله مايحصل.. والله مايحصل .. والله مايحصل ياباشا ..
إفرح لك يوم ولا التانى ولا التالت حتى .. حق هؤلاء الشرفاء لن يذهب أبدا طالما كان ورائه رجال صدقوا الله وأخلصوا نياتهم وقاموا برفض الظلم المتمثل فيك وفى من يساندك ويعينك على قطع دابر حماستى وقتل وفقع عين غيرى , وأظن الرجال فى زمننا هذا كتيير كتير أوى ياباشا.
وأخيرا أقولك
أفرح .. أفرح ياباشا
